Luvratori d’instruments da flad

Reparaturas, revisiuns e revisiuns totalas per instruments da lenn e stuors. Dil contact inizial tochen alla surdada discuorras ti directamein cun mei.

Tiu instrument.
Mia premura.

Dumandar ina reparatura

Luvratori per lenn & stuors

Jeu examineschel igl emprem tiu instrument. Pintga reparatura, schubergiada, revisiun ni revisiun totala: Il stan effectiv definescha la lavur. Ils cuosts e lavurs supplementaras discuteschel jeu cun tei ordavon.

Cuort scriver
Scriva tgei instrument che ti has, descriva il problem e numna tiu giavisch da termin. Ina fotografia ni in cuort video gida per in’emprema valetaziun.
Sclarir communablamein
Jeu examineschel igl instrument e nus fixein las lavurs, la rama dils cuosts ed il termin da surdada.
Surdar cun quitau
Suenter la lavur controlleschel jeu sche igl instrument funcziuna endretg e sche la mecanica ei giustada endretg. Alla surdada discutein nus era il manteniment.

Schubergiada chemica

Mo per instruments da stuors

Era dadens duei tut constar.

Il verdirom («Grünspan») che setacca egl instrument vesan ins strusch da dadora. Ina schubergiada profunda s’auda tier il manteniment. Il mument adattau dependa da con savens che ti sunas e co ti tgiras sez tiu instrument.

Demontar e schubergiar chemicamein
Unscher, controllar e giustar la mecanica
Midar ora ils filzs dils nuvs e dils uvierchels da ventil
Midar ora ils corcs dallas clappas d’aua

Autras parts e reparaturas, per exempel guidas da ventil ni plemas dallas clappas d’aua, vegnan quintadas separadamein suenter cunvegnientscha. Ina revisiun totala ei ina lavur pli vasta.

Revisiun totala & niev finish

Tiu instrument da stuors sa era vegnir laccaus, argentaus ni surdoraus cumpletamein da niev. Giavischs individuals discutein nus vid igl instrument: Communablamein sclarin nus tgei che fa tecnicamein senn e va a prau cun tei.

Rimnada e retuorn d’instruments

Jeu rimnel ils instruments da vossa societad da musica per service e reparaturas e portel els anavos. La rimnada ed il retuorn san era vegnir reservai separadamein.

Surselva e regiun Flem/Laax

CHF 100–150

Contribuziun als cuosts da transport per rimnada ni retuorn, tenor il liug e naven da diesch instruments annunziai per il service.

La contribuziun vala per igl entir transport en in liug da surdada communabel, buca per instrument. Il prezi ligiont fixein nus ordavon.

Lavurs vid ils instruments, il cuors ed il material da tgira ein buca inclus.

Autras regiuns el Grischun sin damonda.

Transport ed ulteriurs instruments

In termin cumpeglia miu viadi tier vus ed anavos a casa. La rimnada ed il retuorn pli tard ein dus termins.

Il diember e la grondezia dils instruments ston haver plaz en ina cargada dil bus. In eventual transport dil bus cul tren fixein nus supplementarmein ordavon.

Ulteriurs instruments sai jeu valetar cuort suenter annunzia e prender cun mei sche nus essan secunvegni davart ina reparatura. Ina valetaziun digl inventari dalla societad ei pusseivla suenter cunvegnientscha.

La rimnada sa vegnir cumbinada cul cuors da tgira, ch’ins sa reservar separadamein. Per il termin communabel vegn il transport quintaus mo ina gada.

Tier il cuors da tgira

Buchin & buccadira

Exclusivamein per instruments da stuors: Buchin e buccadira lavuran ensemen. In niev buchin sa gidar. Mintgaton porta ina midada el sunar dapli. Nus mirein communablamein sil tun, la buccadira, la perseveronza e tias finamiras – senza obligaziun da cumprar.

Model gia enconuschent

Cumpra directa

Prezi digl artechel

Negina taxa supplementara

Ti enconuschas la marca ed il model e vulas cumparegliar nuot? Lu paghas ti il prezi dil buchin – senza seria da tests ni analisa dil sunar.

Test & cussegliaziun persunala

Test da buchins

CHF 60.–

Ina mes’ura per tei

Nus cumparegliein buchins adattai cun tiu agen instrument. Mia cussegliaziun sco era la preparaziun e la schubergiada dils buchins da test ein inclusas.

Test, analisa & coaching

Coaching da buchins

CHF 150.–

Circa in’ura

Nus mirein sin la buccadira, la respiraziun, la posiziun dalla lieunga ed il spazi dalla bucca. Sche necessari empruein nus buchins e lavurein vid pass concrets per il tun, l’altezia, la buccadira e la perseveronza.

CHF 60 ni CHF 150 – mai omisdus. Il test da buchins ei inclus el coaching. Ina eventuala cumpra d’in buchin e modificaziuns manualas vegnan quintadas separadamein. Porta tiu instrument e tiu buchin actual. Nus empruein ils buchins tier mei.

Vendita · Affittar · Occasiuns

Stomvi, Geneva e John Packer fuorman accents da mia purschida. Era Besson, Yamaha ed autras marcas sco era instruments da lenn procurel jeu sin damonda. Ils models mussai cheu ein mo ina pintga selecziun. Tier mei stattan a disposiziun aunc biars auters instruments per empruar ora. Tgei che ti vulas empruar discutein nus avon tia viseta.

Actualmein per empruar ora

Stomvi Titan Preference MK

Goldbrass, Bellflex ed irom: Tut las treis variantas ein tier mei per empruar ora – cun tut las culissas «Züge» supplementaras ed ils buchins actuals da Stomvi. Porta era tiu buchin usitau e pren temps per udir e sentir sez las differenzas.

Geneva

Cornet Cardinal

Cornet · laccau

Geneva

Cornet Heritage

Cornet · argentau

Geneva

Euphonium Cardinal

4 ventils · laccau

Geneva

Bariton Cardinal

3 ventils cun trigger · argentau

Affittar in instrument ni encurir in’occasiun?

Scriva tgei instrument che ti enquerras, per tgi ch’el ei e con ditg che ti drovas el. Nus sclarin il stock, il stan, il prezi e las pusseivladads adattadas. Las cundiziuns d’affittar ed ina eventuala cauziun retscheivas ti avon la decisiun.

Per societads da musica procurel jeu sin damonda era instruments da percussiun ed accessoris.

Tgira d’instruments per societads

Con bia ieli? Tgei grass? E tgei sai jeu schubergiar sez? Ina sera da tgira per instrumentalists da stuors fa ils pass per la tgira a casa pli capeivels – senza transformar vies local d’emprovas en ina stanza da lavar.

Declarau a moda clara

Mussar la tgira ed ils sbagls frequents vid igl instrument. Plinavon ils ielis, ils grass ed ils barschuns adattai per ils differents instruments.

Ina pintga part pratica

Empruar ensemen la tgira dil buchin ed emprender ils pass per unscher. Il decuors e las pusseivladads dil local sclarin nus ordavon.

Prender enzatgei cun sesez

Sets da tgira adattai mettein nus ensemen tenor igl instrument ed il basegn. La dimensiun ed ils cuosts fixein nus ordavon. In cuort manual per leger suenter ei previus.

Ils cuors da tgira ein en preparaziun. Jeu planiseschel igl emprem ina sera da pilot. Sche vossa societad ha interess, discutein nus communablamein con ditg che va, la grondezia dalla gruppa ed il viadi. Il prezi secumpona d’ina pauschala da basa e d’ina summa per persuna. Ils cuosts exacts discutein nus ordavon.

Davart igl instrument e tia viseta.

Cu drova miu instrument ina schubergiada?

Quei dependa dil diever, dalla tgira e dil stan. Certs professiunals portan lur instrument mintg’onn. Tier sunar regular ed intensiv fa ina controlla suenter circa dus onns savens senn. Depositaziuns verdinas egl intern vegnan savens numnadas verdirom («Grünspan»). Ellas pon esser colligiadas cun corrosiun dil metal. Cun il temps s’accumuleschan era restonzas da caltschina, ieli, grass e spida. Quellas depositaziuns san impedir il passadi dall’aria e disturbar la mecanica. Sche ti remarcas depositaziuns ni sche las culissas «Züge» ni ils ventils funcziunan mal, s’annunzia pli baul. Jeu examineschel sche ina schubergiada professiunala digl intern ei necessaria. Ina tgira regulara sa gidar da retardar il «Zinkfrass».

Sai jeu semplamein vegnir sperasvi?

Per plascher fixescha igl emprem in termin. Jeu lavurel era sco scolast da musica e sun buca adina egl atelier. Il pli sempel contonschas ti mei cun in cuort messadi WhatsApp.

S’audan instrucziun e luvratori ensemen?

Gie, quellas experientschas secumpleteschan. L’instrucziun regulara va sur la Scola da musica Surselva. Il test da buchins ed il coaching singul da buchins porschel jeu directamein egl atelier. Dapli davart mia lavur musicala

Scriva a mi.

Sche jeu sun en luvratori ni vid instruir, s’annunziel jeu pli tard. Visetas suenter cunvegnientscha.

Reparatura via WhatsApp

Ina fotografia ni in cuort video gida per in’emprema valetaziun.

Remo’s Musikatelier
Remo Derungs

Sumaseras 70D
7147 Vignogn
Lumnezia, Grischun

079 204 09 17 [email protected]Termins tenor cunvegnientscha

Tiu instrument.Mia premura.

Luvratori per lenn & stuors

Cuort scriver

Sclarir communablamein

Surdar cun quitau

Rimnada e retuorn d’instruments

Surselva e regiun Flem/Laax

Buchin & buccadira

Cumpra directa

Test da buchins

Coaching da buchins

Vendita · Affittar · Occasiuns

Stomvi Titan Preference MK

Cornet Cardinal

Cornet Heritage

Euphonium Cardinal

Bariton Cardinal

Affittar in instrument ni encurir in’occasiun?

Tgira d’instruments per societads

Declarau a moda clara

Ina pintga part pratica

Prender enzatgei cun sesez

Davart igl instrument e tia viseta.

Scriva a mi.

Tiu instrument.
Mia premura.